ባና ብርሑቕ ኣብ ጠፈር ቀዲዱ ዚረአ ሃሳስ ብርሃን ኢዩ። 

ባና ኪብሃል ከሎ ኣብ ክልተ ይኽፈል፥

I. ንወጋሕታ ዚእንፍት ኣብ ጠፈር ዚረአ ክስተት

- መሬት (ሰማይ) ወገግ ምስ በለ

- ኮኾብ ጽባሕ ደሚቑ ኪረአ ከሎ

- ቅሔ ጽልሚ ምስ ቀደደ

- ሰርቂ ብርሃን ምስ ገበረ

ኣብ ገጠራዊ ናብራ፡ እቶም ብእንስሳታት ዚከናወኑ ቀንዲ ኣበሰርቲ ወጋሕታ፡ እዞም ዚስዕቡ ኢዮም፥

1. ኣርሓደርሆ ደጋጊሙ ምስ ዝንቁ

2. ኣዕዋፍ ጩቕጩቅ ምስ ዚብላ፡ ብፍላይ ድማ እታ ዑፍ ጽባሕ

II. ካብ ዓበይቲ ከተማታት፡ ዓድታት፡ መጋርያ፡ ደምበታት፡ ባርዕ ሓዊ ወዘተ. ብርሑቕ ዚረአ ብርሃን 

ናብ ሓደ ዓዲ ብለይቲ ምስ እትጓዓዝ፡ ኣብቲ ዓዲ ከይበጻሕካ ኣብ ርሑቕ ከሎኻ፡ ካብቲ ቦታ ዚምንጨወ ብርሃን ትርኢሞ እምበኣር ኣብ ዓዲ በጺሐ እየ ኢልካ ተስፋ ትገብር፡ ማለት ኣብ መጠረስታ ሽቶኻ ከም ዝበጻሕካ ትፈልጥ። ከምዚ ምባልካ ድማ ድሕሪ ብዙሕ ድኻምን ሓደጋን ዝመልኦ ጕዕዞን ሓርጎጽጎጽን፡ ኣብ ዓወት ስለ ዝበጻሕካ ኢዩ።

ባና ናጽነት ኪብሃል ከሎ ውን ከምኡ ኢዩ። ነዊሕ ተቓሊስካ፡ ቃልስኻን ገድልኻን ኣብ መወዳእታ ምዕራፍ ከም ዝበጻሕካ ዝእንፍት ተርእዮ፡ ሓይሊ ጸላኢ ፈርሸኽሸኽ ኪብል ከሎን፡ ተጻረርትኻ ገሊኦም ኪሃድሙ ገሊኦም ድማ ኢዶም ኪህቡን ከለዉ፡ ሽዑ ናይ ናጽነት ተስፋ ይሰፍን፡ ኣብ ሽቶኻ ከም ዝበጻሕካ ድማ ትፈልጥ። ስለዚ፡ ብስእላዊ መገዲ፡ ባና ዚብል ቃል፡ ንኹሉ እቲ ከም ዕላማኻ እትወስዶ ነገራት፡ ከም ዝቐረበን ኪኽሰት ድማ ነዊሕ ከም ዘይወስድን ዚገልጽ ናይ ተስፋ ቃል ኢዩ። ከም ናይ ተስፋ ጩራ ኮይኑ እውን ኪውሰድ ይኽእል ኢዩ። በዚ ኣበሃህላዚ ድማ፡ ባና ናጽነት፡ ባና ሓርነት፡ ባና ዓወት፡ ባና ራህዋ ወዘተ. ክንብል ንኽእል።